लहान मुलांसाठी म्हणून लिहिलेल्या पुस्तकांवर विश्वास ठेवून
ती आपण आधी न वाचताच त्यांना तशीच वाचून दाखवणं
कधी कधी आपल्यालाअडचणीत आणू शकतं.
अशाच एका पुस्तकातली गोष्ट तरुला खूप दिवसांपूर्वी वाचून दाखवलेली.
त्यावेळी ‘माणसं वाईट वागली तर देव त्यांना शिक्षा करतो’ असलं
समजावून सांगायला अतिशय अवघड असं वाक्य त्या गोष्टीत होतं.
आज तरुला ते पुन्हा सगळं आठवत होतं आणि तो आईला पुन्हा पुन्हा विचारत होता,
"आई,देव कुठे असतो गं?"
सगळ्यांनाच पडणारा हा प्रश्न तरुला फारच लवकर पडला होता!"
आपणच देव असतो आणि चांगला विचार म्हणजेच देव
हे त्याला कसं सांगावं या विचारात रुपाली असतानाच तिला माझा फोन गेलेला.
मग आम्ही तिघांनी मिळून त्यावर विचार केला.
तेंव्हा "देव दिसत नाही मग तो शिक्षा कशी करतो?"या तरुच्या प्रश्नाने
आम्ही निरुत्तर झालो.
आमची गोची त्याच्या लक्षात आली की काय माहित नाही,
पण तो म्हणाला,"ती गोष्ट आपण पुन्हा नकोच वाचुया.ती वाचलीय आपण पूर्वी."
