अंक संपतात!

बोटं मोजत लहान लहान गणितं करायला येतात आता तरुला.
पण ती सगळी सहाच्या आसपास असायला हवीत.बेरीज,वजाबाकी
कळायला लागलीय.रुपाली एकदा म्हणाली "पुढे खूप सारे अंक असतात अरे..
अंक संपतच नाहीत."
तरुला हे फारच गमतीचं वाटलं.
रुपालीनं मग शंभर,हजार वगैरे गोष्टी सांगितल्या.
आणि त्याच्या पुढे अंक असतोच हे सांगितलं.
तरू म्हणाला ते मजेशीर होतं.तो म्हणालेला,
"मला तर सहापर्यंतच येतं.मोजता नाही आलं तर अंक संपतात!"
त्यानंतर काही दिवस जो भेटेल त्याला तरुचा एकच प्रश्‍न होता,

"तुम्हाला कितीपर्यंत अंक मोजता येतात?"