मी रंगवणार गणपती!

आज तरुला शिरगावची खूपच आठवण येत होती.
तशी ती रोजच येते म्हणा.
"आई आपण कधी जायचं शिरगावला?" आजही त्याने विचारलं.
मी फोनवर ऐकत होतो त्यांचं बोलणं.
रोज त्याला काय उत्तर द्यावं हा प्रश्‍न रुपालीसमोर असत असेल.
"गणपतीला जाऊया "तिने आज सांगितलंच त्याला.
"कधी?"
"दोन महिन्यांनी असणार गणपती."
"कोण करणार गणपती ?"
तरुला माहिताय गणपती करतात ते!
"आजोबा"
"मी रंगवणार गणपती !"
त्याला सगळं दिसत होतं पुढं.
"मी गुलाबी रंग देणार!"

तरुने गणपतीचे दिवस मनात जागे केले.
तरुने गेल्या वर्षी गणपती रंगवतानाच
पहिल्यांदा ब्रश हातात घेतलेला.
आणि मी मूर्ति तयार करताना मलाही
सतत तरू समोर दिसत होता.
त्याने आठवण केली म्हणून मी
समईच्या उजेडात काढलेले फोटो बघत होतो आता.
छानच वाटत होतं ते मंद प्रकाशातलं रूप!