मलासुध्दा रंगवता येतं!

आम्ही दरवर्षी आमचा आम्ही
घरीच तयार करतो गणपती.
मातीचा. छोटासाच.
खूप मजा येते.
नंतर विसर्जनही घरीच करतो.
तीच माती पुन्हा वापरता येते.
मुख्य म्हणजे मिरवणूकीच्या गोंगाटातून सुटका होते.
खूप मजा येते.

गेल्या वर्षी गणपतीला रंग देताना तरू बघत होता सगळं.
नीट लक्ष होतं त्याचं.
तो होता तीनच महिन्यांचा.
त्याला बाजुला झोपवून
त्याच्याकडे बघत बघतच
मी कुंचला फिरवत होतो.
हळुवारपणे.

लहान मुलाच्या शेजारी असण्याने
किती वेगळे होतो आपण!

या वर्षी मामाने आणि मावशीने रंगवला गणपती.
तरुसाठी मी मातीचा बैल केलेला.
ओल्या मातीचा तो बैल उभा राहीना.
मग आम्ही त्याला छानसं बसवलेलं.

तरूने केलीच की सुरुवात रंगवायला!
हळुवार रंग देणारे तरुचे हात
‘निर्मिती’चा आनंद घेत होते हे नक्कीच.