निरागस

नमस्कार करणं
म्हणजे हात जोडून, ‘नम्र’ होणं
हे तरुला कसं समजलं असावं?
देवळात
देवाला नमस्कार करताना
त्यानं अनेकांना बघितल्यामुळे असेल का ते?
मुलं खरंच किती बारकावे टिपतात ना?
तरू अनेक देवांना ओळखू लागलाय.
गणपती,मारुति,विठ्ठल,कृष्ण,...
आणि कुणाची काय खासियत
हे तो सांगू लागलाय.
म्हणजे...
मोदक,बासरी,डोंगर,गदा,कमरेवरचे हात वगैरे..
आईने शिकवलेली ‘शुभं करोति..’ही प्रार्थना
तो हात जोडून म्हणतोय अलिकडे!